Soridalana ho an’ny taom-panabeazana 2016 – 2017 (tohiny)

Afafi – FET !

Noho ny halavan’ny soridalana dia nozaraina ny fampitana azy mba hazava tsara amintsika ny votoatiny. Indro ary ny tapany faharoa.

Raha toa ka hamaky ny tapany voalohany : Soridalana ho an’ny taom-panabeazana 2016 -2017

—————-

 3. Famandrihana sy fampiasana ny gazetim-panabeazana « ny Hafatro » sy « Firaisankina » 

Araka ny efa iarahantsika mahita dia tafaverina soamantsara ny famoahana sy ny fampielezana ny gazetintsika, “ny HAFATRO sy ny FIRAISANKINA”. Noho ny ezaka nifarimbonana tato amin’ny Foibe Nasiônaly sy ireo nanolotsaina ho fanohanana, dia tsy vitan’ny hoe tafaverina fotsiny fa miseho amin’ny endrika vaovao hatrany. Ny Lahatsoratra sy ireo fampianarana ary fifampizarana dia natao mifanentana amin’ny maha AFAFI-FET sy izay iainan’ny Fiangonana araka ny vanim-potoana lalovana.

Fantatsika mpamandrika sy mpividy ny gazety fa ny Telovolana voalohany taona 2014 no niseho farany “ny Hafatro sy Firaisankina”; dia tamin’ny Telovolana voalohany Taona 2016 ity indray izany vao niseho. Tsy nandoa saram-pamandrihana intsony ianareo izay nanao izany tamin’ny Taona 2014  na 2015 fa avy hatrany dia nandray ny gazety mifanaraka amin’ny famandrihana nataonareo. Noho ny fiakaran’ny saran’ny fanontana azy tany amin’ny Tranopirinty na ny imprimerie anefa dia nisy famenon’ny saram-pamandrihana tsy maintsy nataonareo nomarihina teo amin’ny adiresy hoe: “reste à payer”, ho an’izay mbola tsy nahavita izany.

Noho ny gazety efa niseho indray mandeha tamin’ny Taona 2014 anefa dia ny Laharana 216 ho an’ny Firaisankina ary ny Laharana 799 kosa ho an’ny Hafatro, no miseho farany amin’ity taona 2016 ity. Tapitra hatreo izany ny famandrihana rehetra ho an’ireo nanao izany teo aloha, fa dia Famandrihana vaovao indray isika manomboka ny Janoary 2017.

Hatramin’izao fotoana anoratanay izao dia mbola tsy marin-toerana ny vidin’ny gazety noho ny fiovaovana misy any amin’ny Trano pirinty. Koa raha vantany vao fantatra izany dia hampandrenesina araka izay haingana isika hahafahantsika manao ny famandrihana amin’izay fotoana izay.

Koa entanina mihitsy isika Mpanabe , indrindra ianareo Ekipa na Biraon’ny Diosezy, amin’ny famporisihana ny mpikambana, hatrany amin’ny ekipa fototra ka hatrany amin’ny Ankizy sy ny Tanora tsirairay, amin’ny famandrihana sy fividianana ary fampielezana ny Gazetim-panabeazana.   Io no fitaovana entina mampivory sy manabe ny ankizy (Jereo ny Fampianarana sy Fepetra ao amin’ny Torolalana momba ny Dingana). Ao no ampitana ireo fampianarana sy fanabeazana manampy antsika amin’ny fanabeazana. Tsy ho àry ho hita any anaty Bokim-panabeazana daholo mantsy ny  rehetra. Entanina toraka izany koa ny fandefasantsika vaovao na fifampizarana haseho ao anatin’ireo gazetintsika ireo.

4. Tatitra isan-taona (taom-pikatrohana 2015-2016) 

Ampahatsiahivina hatrany isika fa isan-taona toy izao no fandefasana ny tatitra isan-diôsezy miakatra aty amin’ny Foibe Nasiônaly. Amin’ny alalan’io tatitra alefanareo io no ahafahanay ihany koa manao tatitra any amin’ireo Eveka Raiamandrenintsika na ny CEM izany, ary koa mankany amin’ny Foibe Iraisam-pirenena any Rôma. Koa iangaviana isika mba handefa araka izay haingana io tatitra io, fara-fahatarany amin’ny 15 Desambra  2016.  Marihina manokana eto fa araka ny fanentanana sy ny fiangavian’ny Aomônie Nasiônaly tamin’ireny fiofanana nataontsika ireny dia iangaviana isika hamerina indray ny tatitra izay efa nataontsika ka hanao sy hanatontosa izany an-tsakany sy an-davany. Maro amin’ireo nahatonga tatitra mantsy no tsy nanaraka ny zavatra nangatahina tao anatiny; ka iangaviana mihitsy mba tsy hisy hodinganina izay anontaniana sy ilaina.

Toy izao no tokony ho hita ao anatin’ny tatitra:

• Nanao ahoana ny nampiharana ireo Soridalana iombonan’ny FET manerana ny Nosy ho an’ny Taom-pikatrohana 2015-2016 ? Hatraiza ny fomba nanaparitahana azy io ? Tafita hatrany amin’ny ekipa fototra rehetra ve ?
• Inona no vokatra na fiatraikan’ny Fiofanana Nasiônaly natao farany tamin’ny 2013 tany Fianarantsoa ?
• Manao ahoana ny firafitry ny Ekipa na Biraon’ny Diôsezy ?
• Manao ahoana ny fomba fiasa eo anivon’ny Ekipa na Biraon’ny Diôsezy ?
• Manana Fitsipika anaty mifehy ve ny AFAFI-FET Diôsezy ? Raha misy dia alefaso miaraka amin’ny Tatitra.
• Manao ahoana ny fandraisanareo anjara ao anatin’ny Vovonan’ny Ankizy sy ny Tanora ary ny Olondehibe ?
• Inona avy ireo hetsika fanaon’ny Diôsezy amin’ny fanentanana ny AFAFI-FET ?
• Oviana ny Fampiofanana Mpanabe farany nataonareo teo anivon’ny Diosezy ?
• Mandray anjara amin’ny fampielezana ny Fanolorana ny andro ve ny AFAFI-FET amin’ny Diôsezy? Firy ny Fanolorana ny andro voaparitakareo nalaina na nohafarana avy aty amin’ny Foibe Nasiônaly ?
• Isaky ny firy taona no manatanteraka fiofanana ho an’ny mpanabe eo anivon’ny Diôsezy ianareo ?
• Oviana ny fitsidihana farany nataon’ny Foibe Nasiônaly teo anivon’ny Diosezinareo, zaikabe na Fiofanan’ny Mpanabe ?
• Eo amin’ny lafiny fanabeazana ny AFAFI-FET sy fitantanana ankapobeny eo anivon’ny Diosezy, inona ny lafy tsara tokony ho tohizina ? Inona ny lesoka ? Inona ny vahaolana noraisina ?
• Eo amin’ny fanabezana FET amin’ny ankapobeny eto Madagasikara, misy sosokevitra ve mety hahatsara ny rehetra ?
• Antotanisa :

• Firy no isan’ny FET nanao Dingana III isan-tsampana ? ny AFAFI nanao Fanolorantena ?
• Firy no isan’ny Fiangonana na ny Paroasy misy ao amin’ny Diôsezy, ary firy amin’izany no

ahitana FET ? Firy no misy AFAFI ?

• Aoka hatao soratra printy (saisie) ny tatitra (alefa mailaka na atao amin’ny CD).
• Ho an’izay toerana misy « Internet », aoka hanokatra adiresy mailaka ho an’ny Ekipan’ny Diôsezy hahamora ny fifandraisantsika.

 4. Rakitra miakatra

Efatra taona lasa izay dia nentanina isika mba hanao Rakitra miakatra indray mandeha isan-taona isaky ny Fiangonana misy AFAFI-FET mankatý amin’ny Foibe Nasiônaly. Mbola vitsy anefa ireo manatanteraka izany isan-taona. Tamin’ity taona ity dia diosezy 6 monja no nandefa izany ka isaorana azy ireo: Ambanja, Antananarivo, Antsirabe, Tsiroanomandidy, Ihosy ary Ambatondrazaka. Marihina fa misy amin’izy ireo no tsy nahatonga afa-tsy Fiangonana iray na roa ihany.

Tsara hatrany ny manamarika sy mampahafantatra antsika fa eo amin’ny sehatra iraisam-pirenena dia ny isan’ny olona manao latsakemboka no amantarana ny isan’ny mpikambana ara-dalàna. Mbola sarotra ho antsika anefa hatreto ny manao latsakemboka na « cotisation », ka dia io Rakitra io no hita fa mety, indrindra ho an’ny FET, fa ny mpanabe sy ny AFAFI dia afaka manao latsakemboka. Isika rahateo koa anefa tsy maintsy manao adidy eo anivon’ny Fiombonan’ny AFAFI-FET aty Afrika sy Eran-tany ka amporisihin’ny Foibe any Roma hanao izany.  Eo ihany koa ny fampandehanan-draharaha eto anivon’ny Foibe Nasiônaly. Io fanaovantsika adidy eo amin’ny sehatra Iraisam-pirenena sy Nasionaly io no ahafahantsika ihany koa avy eo mangataka fanampiana rehefa misy ny hetsika iombonana, toy ny Kôngresy na Fiofanana nasionaly.

5. Tranokalam-pifandraisan’ny AFAFI-FET Madagasikara

Ho fanatsarana  ny tranonkalan’ny AFAFI-FET Madagasikara (Siteweb: www.afafi-fet.org ) sy ny Facebook (apmej-afafifet Madagascar ) dia azontsika atao ny mandefa vaovao sy manome sosokevitra.

FANAMARIHANA

• Raha misy manana sosokevitra ho an’ny fankalazana ny faha-100 taonan’ny FET  Madagasikara dia tsara  raha ampiarahana amin’ny tatitra.
• Ity tatitra farany ity no hoentina any amin’ny fivoriana hatao any Naïrobi amin’ny volana Aprily 2017. Koa aoka mba samy hiezaka hanatanteraka izany antsakany sy andavany.