Miantso antsika hivavaka ho an’ny fandriampahalemana ny Ray Masina Fransoa
Nanomboka omaly tany Assise ny fihaonana iraisam-pirenena faha-30 ho an’ny fandriampalemana ka haharitra hatramin’ny talata 20 septambra. Handray anjara amin’izany ny Ray Masina Fransoa ka niantso « ny paroasy, ny fikambanana masina sy ny firohotana ary ny mpino maneran-tany mba hivavaka ho an’ny fandriampahalemana ». Nohamafisiny tamin’ny Anjelisy ny alahady teo fa « feno ady izao tontolo izao ka mila miara-mivavaka ho an’ny fandriampahalemana isika ».
30 taona nikatsahana ny fandriampahalemana
Marihina fa ny 27 oktôbra 1986 no nisian’io fihaonana io voalohany. Mpitarika fivavahana 120 no namaly ny antson’i Papa Joany Paoly faha-II tamin’izany fotoana izany. Miisa 500 kosa ireo mpandray anjara andrasana amin’ity taona ity. Isan’ireny ny arsevekan’i Canterburry Justiny Welby sy Bartholomée I, patriarka any Constantinople.