Fangatahana ampanaovin’ny Papa Ray Masina – Mey 2018
« Mba ho afa-manatanteraka ny andraikiny manokana eo amin’ny asa fitoriana imasoany ny lahika, ka hampiasa ny talentany manoloana ny fanamby apetraky ny fiainana ankehitriny ».
Ny asa fitoriana sahanin’ny lahika indray no ifantohan’ny fangatahana iombonan’ny Fiangonana manontolo amin’ny Papa, mandritra ity volana Mey ity. Ny atao hoe moa lahika dia ireo kristianina vita Batemy ka tonga rantsam-batan’i Kristy sy anisan’ny vahoakan’Andriamanitra, ary manana anjara amin’ny maha-mpisorona sy mpaminany ary mpanjaka an’i Kristy, nefa tsy nandray ny sakramentan’ny Fandraharahana Masina. Manana anjara lehibe ny lahika ao amin’ny asam-pamonjena, noho izy miorina amin’ny Batemy noraisina.
Ny Kônsily Vatikana faharoa dia namolavola sy manolotra « Sori-dalana momba ny Asam-pamonjena ataon’ny Lahika », entina hanehoana fa manana anjara toerana lehibe ny Lahika amin’ny asa fitoriana iantsorohany eo amin’ny sehatra sy ny fiaraha-monina misy azy. Hoy indrindra ny kônsily : « Voantso hanao asa famonjena ny kristianina lahika. Manana anjara amin’ny raharaha nanirahana ny Fiangonana izy amin’izany. Ny asam-pamonjena ataon’ny lahika dia ny fanintarana ny Fanjakan’Andriamanitra sy ny handavorary ny olombelona » ( Konsily Vatikana II, APL Toko I, 2 ).
Fomba sy endrika maro samihafa no azo anehoana sy anatanterahan’ny lahika io asam-pamonjena na fitoriana ataony io. Mazàna mantsy isika no alaim-panahy hihevitra fa ny lahika miasa mivantana ao amin’ny Fiangonana na paroasy ihany no atao hoe lahika mirotsaka na mandray andraikitra. Ny asa sy ny fiainana andavan’andro mihitsy no sehatra voalohany anehoana sy itoriana ny Vaovao Mahafaly. Ny fahaizana sy ny talenta nomen’Andriamanitra ny tsirairay kosa no fitaovana mahomby anatanterahana izany. Sady amin’izao androntsika izao koa dia tsy vitsy ireo mitoky loatra ny fandrosoana ara-pahaizana sy ara-teknika fotsiny, ka mirona manompo zavaboary, manjary andevozin’izy ireny, nefa tokony ho tompony. Fa tena adidy tokony hiantsorohan’ny kristianina ny mampivoatra ny lafim-piainana ara-nofo, rehefa tarihin’ny fahazavana avy amin’ny Vaovao Mahafaly sy ny torohevitra avy amin’ny Fiangonana izy ary asesiky ny fitiavana maha-kristianina.
Adidy lehibe ho an’ny kristianina lahika ny manao asa fitiava-namana sy fiantrana amin’ny lafiny rehetra sy ambaratonga rehetra. Ny fianakaviana, ny Fiangonana, ny tanora, ny fikambanana, ny mpiara-monina, ny firenena, ny fifandraisana iraisam-pirenena : ireo no sehatra iasan’ny kristianina ka anaovany asam-pamonjena mifanaraka amin’ny vanim-potoana misy sy lalovana. Samy nomen’Andriamanitra talenta, fanomezam-pahasoavana tamin’ny Fanahiny Masina ny olombelona tsirairay, mba hanatontosana ny asa famonjena manandrify azy avy. Fa « zarazarainy amin’ny olona rehetra, araka izay tiany ireny » (I Kor 12, 7).
Koa adidin’ny kristianina rehetra àry, adidy ambony tokoa, ny miezaka mba hahafantaran’ny olombelona rehetra eran-tany ny famonjena ambaran’Andriamanitra sy mba hamonjeny azy. Izany no iangaviana sy amporisihan’ny Fiangonana mafy ny kristianina lahika mba tsy hikely soroka amin’ny asam-pamonjena.
Eo am-pamaranana ny fampianarany ny Konsily Vatikana II, dia izao no ambarany : « Koa izao àry ny Kônsily masina dia mangataka mafy ny lahika rehetra, amin’ny anaran’ny Tompo, mba hanoina antso an’i Kristy, izay miangavy azy mafy tokoa ankehitriny, ary mba hanaiky hohetsehin’ny Fanahy Masina : ka tsy hirefarefa fa harisika sy ho vonona avy hatrany » (Konsily Vatikana II, Toko V, 33).
Narisoa sj
N.B : Loharano nanovozana : ny Kônsily VATIKANA II, Sori-dalana momba ny Asam-pamonjena ataon’ny Lahika (APL)