Fanentanana avy amin’ny Foibe nasiônaly
Taratasim-pifandraisana : 004_01/08/2018
« Tompo ô, Ianao no manana ny Tenin’ny fiainana mandrakizay » (Joany 6, 69)
AFAFI ! – FET !
An-kafaliana indray no iarahabana antsika rehetra amin’ny alalan’ity taratasim-pifandraisana fahaefatra ity.
Indreto misy vaovao maika ampitaina amintsika rehetra ka raha misy manana fahafahana sy fahavonona dia iangaviana mba hiantso aty amin’ny Foibe Nasionaly avy hatrany.
-
Fihaonamben’ny MEJ France
Ny 02 sy 03 Novambra 2018 dia hisy ny fihaonan’ireo MEJ France 12 – 18 taona. Nandefa taratasy fanasana ho an’ny Firenena vitsivitsy manana FET izy ireo, ka anisan’izany isika eto Madagasikara. Ny angatahan’izy ireo amintsika dia ny hifampizarana traikefa mandritra io fihaonana io.
Toy izao àry ny fepetra ilaina ho an’ireo manana solontena afaka hiatrika io fotoana io :
- FET (Irak’i Kristy – Vavolombelon’i Kristy – Ekipa Kristianina Ankehitriny) tafiditra ao anatin’ny tonon-taona 12 hatramin’ny 18 taona.
- Mahalala tsara ny FET, indrindra ny sampana misy azy
- Mahay miteny sy mahazo ny teny Frantsay ary olona afaka hifampizara ny fiainam-pikambanana, izany hoe mahalala tsara ny FET, indrindra ny Sampana misy azy raha IK na VK, fa mahafehy ny rehetra kosa raha EKA.
- Afaka hifandray sy hifanerasera amin’ny hafa
- Miantoka manontolo ny Saran-dalana sy izay mety ho fandaniana rehetra : any an-toerana , fikarakarana ny taratasy sns
- Atolotry ny Aomônie na ny Biraon’ny Diosezy
Marihina fa mbola hisy ny « entretien » hampanaovin’ny Foibe Nasionaly ireo solontena mikasa hanatrika io fotoana io, ka aorian’izay vao miaraka manomana ireo fifampizarana hatao ny mpandray anjara sy ny Ekipa Nasionaly.
Amporisihana ihany koa ireo FET mipetraka na manohy fianarana any ivelany ka mahafeno ny fepetra takiana mba handray anjara ao anatin’io fihaonana io.
-
Andron’ny Lahika 2018
Ny 29 sy ny 30 Septambra 2018 ho avy izao no hankalazana ny andron’ny Lahika, ka ny Diosezin’Ambositra no hampiantrano izany. Afaka mamonjy io fotoan-dehibe io avokoa isika AFAFI-FET manerana ny Nosy. Ny CEPAL no tompon’andraikitra voalohany amin’ny fikarakarana izany.
Toy izao ny mombamomba izany :
- Sarandasy : 20000 Ariary isan’olona (manomboka sakafo zoma hariva hatramin’ny alahady alina)
- Ho an’ireo izay handeha fiara iombonana : saran-dalana miala eto Antananarivo : 30000 ariary (Aller et retour)
Départ : Zoma maraina (eto amin’ny CNPC Antanimena)
Retour : Alatsinainy maraina
Marihina fa miankina amin’ny zava-misy no mety ho fiovan’ny sarandalana.
Azontsika atao ny mandefa ny fisoratana anarana aty amin’ny Foibe Nasionaly mialoha ny zoma 24 Aogositra 2018. Raha tara an’izay kosa dia alefa avy hatrany ao amin’ny CEPAL fara-fahatarany ny zoma 07 Septambra 2018. Ny sarandasy sy sarandalana dia tsy maintsy aloa miaraka eo am-pisoratana anarana.
Dia mirary soa ho antsika rehetra.
Ny Aomônie Nasionaly sy ny Ekipa Nasionaly